Pas gati 12 orësh kërkime, shërbimet e Policisë i kanë ardhur në ndihmë një turisteje italiane, që ishte bllokuar në një shpellë në Karaburun. Turistja italiane kishte mbetur aty, pasi e kishte të pamundur lëvizjen për shkak se i kishin mbaruar uji dhe ushqimi.
“Shërbimet e Stacionit të Policisë Orikum, menjëherë pas njoftimit nga një shtetas italian, se një shtetase italiane me të cilën ai po eksploronte zonën e Karaburunit, prej 3 ditësh, kishte mbetur afër një shpelle në këtë zonë pasi e kishte të pamundur lëvizjen për shkak të mungesës së ushqimit dhe ujit, kanë shkuar në këtë zonë, bashkë me shërbimet e repartit “Delta”.
Pas gati 12 orësh kërkime, bashkë me disa specialistë të zonave të mbrojtura dhe pjesëtarë të guidave turistike që njihnin zonën, në bazë të orientimit me hartë, nga turisti italian, është bërë e mundur gjetja e shtetases italiane, në "afërsi të vendit të quajtur “Qafa e Petrunës”. Turistja italiane mori ndihmën e parë mjekësore dhe ndodhet jashtë rrezikut për jetën. Ajo ka falënderuar punonjësit Policisë që i shkuan në ndihmë.”, thuhet në njoftimin e policisë.
