Në Ministrinë e Financave dhe Ekonomisë u zhvillua takimi i 16-të i Komitetit Drejtues të Menaxhimit të Financave Publike.
Ministrja e Financave dhe Ekonomisë, Delina Ibrahimaj bëri të ditur se në mbledhjen e Komitetit u miratua raporti i vitit të shkuar.
“Kemi arritur të zbatojmë planin e veprimit në masën 96 %, duke siguruar një performancë pozitive, sa i përket arritjeve kryesore: uljes së borxhit publik në nivelin 64 %, përmirësim i deficitit të përgjithshëm fiskal dhe të bilancit primar, rritjes së të ardhurave dhe uljes së informalitetit dhe uljes së detyrimeve të prapambetura të qeverisë qendrore dhe vendore, etj.”, tha Ibrahimaj.
Ajo vuri në dukje se në hartimin e strategjisë së re do të reflektohen rekomandimet e lëna nga institucionet qendrore dhe ndërkombëtare, me synimin për të pasur një sistem sa më të shëndoshë të financave publike dhe për të rritur transparencën.
