Familja Zogu ka hapur dyert e mortit!
Arben Zogu, 46 vjeç dhe dy djemtë e tij Rubens Zogu 19 vjeç dhe Esti Zogu 14 vjeç bashkë me kushëririn e tyre, Melis Zogu, 20 vjeç u mbytën të premten në liqenin e Banjës.
Të afërm dhe miq kanë shkuar atje për ngushëllim pranë shtëpisë së tyre, në fshatin Cingar i Poshtëm.
Nga disa dëshmi, banorët kanë thënë se në liqen ka pasur rreth 10 raste të tilla, prandaj kanë bërë apel edhe ndaj strukturave shtetërore.
“Jam i shokuar. U shuan dy familje. Mbase një prej tyre nuk ka ditur not dhe janë mbytur. Ata nuk duhet të ishin larë atje, pasi ishte me gropa. E njihja 46-vjeçarin, kishte punuar më parë si kameraman”, tha një banor.
Ndërkohë një tjetër banor i zonës tregon se para dy ditësh një tjetër person u mbyt, ndërsa bëhej fjalë për një 75-vjeçar.
Gjatë ditës së sotme është planifikuar përcjellja për në banesën e fundit të 4 viktimave. Ata u dërguan fillimisht në morgun e spitalit për t’i nënshtruar një ekspertize. Pasi t’u bëhet autopsia, do të vijnë pranë familjes dhe rreth orës 17: 00 do të bëhet përcjellja e tyre në banesën e fundit.
Katër viktimat dyshohet se kanë mbytur njëri-tjetrin pasi nuk dinin not.
