Edi Ramën po e kërkojnë në parlamentin e Shqipërisë, të dalë të flasë për ish-zëvëndësin e tij që sipas SPAK merrte para nga inceneratorët. Por Rama nuk shkon në parlament dhe për këtë nuk ka pasur ndonjë arsye për të qenë. Zbulohet se kryeministri ka qenë para televizorit duke ndjekur seancën e parlamentit të Kosovës, ku edhe ndodhi një sherr.
Rama ka reaguar për sherrin në Prishtinë, por ende nuk ka thënë gjysëm fjale për atë që po ndodh në Tiranë.
Mesazhi në rrjetet sociale i Ramës
Të mos jesh dakord me kryeministrin është demokratike, ta shprehësh kështu kundërshtinë është të njollosësh veten, zgjedhësit e tu dhe krejt shtetin me një turp që sot i bën dëm Kosovës edhe ndërkombëtarisht, më shumë se sa çfarëdo qëndrimi politik që po ia kundërshton kryeministrit! Imagjinojini si ndjehen aleatët dhe miqtë e pazëvendësueshëm të Kosovës e të shqiptarëve, kur shohin se si kapen për fyti shqiptarët, aty ku duhet të luftohet me ide e me fjalë, jo me sharje e me grushta! Uroj shumë që opozita të distancohet nga kjo sjellje e turpshme dhe t’i shërbejë Kosovës me forcën e shembullit, jo me shembullin e forcës!
