Gjykata e Posaçme Kundër Korrupsionit dhe Krimit të Organizuar ka hedhur poshtë kërkesën e Ramazan Rrajës për lirimin nga qelia.
I riu kërkoi masë më të lehtë sigurie me argumentin se ka probleme shëndetësore, por togat e zeza nuk e kanë pranuar kërkesën e tij.
Rraja akuzohet për sigurim kushtesh për të kryer vrasje dhe armëmbajtje pa leje. Ai dyshohet se është i përfshirë në atentatin e 1 nëntorit të 2019 tek “Mbikalimi i Shkozetit” ku u plagos ish-prokurori Arjan Ndoj, miku i tij Aleksandër Laho i njohur si Rrumi i Sukthit dhe u vra shoferi Andi Maloku.
Ndërkohë babai i tij, Xhelal Rraja është shpallur në kërkim për dhunën e ushtruar ndaj dy kushërinjve Maja për guroren në Krujë.
