Ministrja e Jashtme Olta Xhaçka, ka pritur sot në zyrë ambasadoren në largim të Shteteve të Bashkuara të Amerikës, Yuri Kim.
“Mikprita sot ambasadoren Yuri Kim në vizitën e saj të fundit si ambasadore e Shteteve të Bashkuara të Amerikës në Shqipëri. Është e trishtueshme të shohësh një mike të mirë të largohet. Kemi punuar shumë së bashku për avancimin e marrëdhënieve midis dy vendeve tona dhe i jemi mirënjohës Yurit që me zemër ka punuar për interesin më të mirë të Shqipërisë.
I urova gjithë të mirat në misionin e saj të ri e të rëndësishëm. E sigurtë që rrugët tona do të kryqëzohen sërish në të ardhmen”, - shkroi Xhaçka në një postim që është shpërndarë edhe nga faqja e Ambasadës amerikane në Tiranë.
Por vetëm pak kohë më parë ishte pikërisht ministria e jashtme që në kulmin e përplasjeve me ambasadoren amerikane për shkak të garës për kreun e ri të SPAK njoftonte në dhjetor të vitit të kaluar se Yuri Kim i kishte mbaruar mandati dhe se ajo po largohej.
“Në përgjigje të interesimeve të medias gjatë gjithë ditës dhe për të shmangur çdo spekulim mbi ‘heshtjen’ e MEPJ, konfirmojmë se procedura e zëvendësimit të ambasadores Kim ka nisur zyrtarisht, ndërkohë që për emrin e ambasadorit të ri procedura nuk na mundëson të bëjmë komente”, - shkruante në atë kohë Ministria e Jashtme.
Vetë ambasadorja e SHBA u se do të qëndronte “edhe ca më gjatë në Shqipëri”. Zëvendësi i ambasadores Kim do të jetë, David Kostelanick. ©LAPSI.al
