Një nga kuajt e betejave të Lulzim Bashës brenda në parti, Gazment Bardhi ka marrë trajtat e rebelit këto ditë brenda PD-së së vulës, që duket e destinuar të tkurret në qerthullin e inateve të brendshme.
E ka hedhur pas krahëve kohën kur e ndiqte Lulzim Bashën me verbërinë e një bindjeje, që buronte nga mirënjohja për atë që i hapi dyert e politikës, duke e emëruar përkohësisht ministër drejtësie.
Si në rastin kur mbrojti qorrazi Kuvendin e 18 dhjetorit, një aktivitet ku 5005 delegatë u tha se mund të uleshin në një sallë me 1958 karrige. Si atëherë kur pranoi të kalojë në heshtje një dorëheqje të Bashës që nuk u zyrtarizua kurrë, pas të cilës pranoi të ngrijë organet e Partisë Demokratike, për sa kohë Enkelejd Alibeaj vetëquhej kryetar.
“Jam i shqetësuar për legjitimitetin e kryetarit të ri të PD nga një proces që ka pikëpyetjet e veta, do ishte vrastare, futja e PD në një tjetër ngërç që vë në pikëpyetje legjitimitetin e institucionit”, deklaroi sot në media.
Me të njëjtën kokëfortësi që i përgjigjej dhunës verbale të militantëve të Berishës, Bardhi kundërshton sot falsitetin e rikthimit të Lulzim Bashës si kryetar.
Por sipas llogarive që ka bërë prej kohësh, Basha do të jetë kryetar pas zgjedhjeve të 29 Korrikut. Edhe pa Bardhin, edhe pa grupin e deputetëve që nuk e mbështesin më.
Lexo edhe: Zgjedhja e kryetarit/ Si u nda PD e vulës nga rikthimi i Bashës
Lexo edhe: Plani i Bashës, që i la me gisht në gojë Bardhin e Tabakun
Kërkesa e tyre është që vendimet t’i marrë Këshilli Kombëtar. Vendimet e rëndësishme të partisë duhet të miratohen nga Këshilli Kombëtar. E po ashtu është Këshilli Kombëtar është ai i cili miraton Komisionin Zgjedhor që do të merret me menaxhimin e zgjedhjeve në parti.
Neni 53 i Statutit thotë se anëtare të këtij komisioni propozohen nga Kryetari i PDSH-së, emërohen nga Kryesia dhe miratohen nga Këshilli Kombëtar. Antarët e këtij komisioni kanë kaluar tashmë me Berishën dhe Basha ka komanduar disa emra të përkohshëm.
Bardhi e ka të qartë që Këshilli Kombëtar nuk mblidhet dot, pasi edhe aty një pjesë e mirë e antarëve janë larguar dhe kjo do të kërkonte zgjedhje të krerëve të degëve, një rrjedhojë që e bën të pamundur të gjithë procesin.
Praktikisht Këshilli është thuajse inekzistent për shkak të largimeve masive drejt Berishës. Në PD e vulës, edhe degët e partisë janë shkrirë. Jo më kot, nuk u arrit të gjendeshin kandidatë për pjesën më të madhe të bashkive të vendit. Një parti pa antarë, kërkon kryetar.
Në këtë situatë, Bardhi i ka dhënë zë atyre që nuk gjejnë më asnjë kuptim në atë që po ndodh.
Në këtë konfuzion politik, Basha është një hap para.
I kishte llogaritur të gjitha; edhe vendimin e gjykatave që do t’ia rimerrnin vulën Berishës, edhe humbjen e Berishës në zgjedhje, edhe mbajtjen përreth tij të një grushti besnikësh që janë gati të luajnë të njëjtën lojë të betejave, që sapo kanë filluar përballë Edi Ramës.
Në mbledhjen e fundit të kryesisë, argumentat e Bardhit, Tabakut, Sulës, Korreshit e të tjerëve morën si përgjigje një breshëri sharjesh dhe shantazhesh rruge. Në fund, mbeten pakicë.
Farsa, tek e cila Bardhi dhe deputetët e vulës nuk gjejnë më kuptim, do të vazhdojë. Partia pa antarë, do të ketë një kryetar./Lapsi.al
