Zëdhënësi i Qeverisë së Kosovës, Përparim Kryeziu, ka reaguar pasi kryeministri i Shqipërisë Edi Rama njoftoi anulimin e formatit të takimit mes qeverive të Kosovës dhe Shqipërisë. Në një deklaratë të Kryeziut të shpërndarë për mediat ai thotë se nga ky vendim humbën qytetarët.
“Mbledhjet e përbashkëta janë ndërmarrje të madhe organizative, të cilave u paraprinë një punë e madhe e ministrive për të përgatitur atë ditë. Nesër do të duhej të nënshkrueshin 13 marrëveshje të reja.
Ato kishin synim t’i afronin ekonomitë tona, sistemet tona të drejtësisë, arsimit, kulturës, etj. Janë qytetarët ata që do humbasin më së shumti. Për fat të keq, anulimi i mbledhjes nga ana e kryeministrit Rama anuloi mundësinë për t’i nënshkruar ato.
Takimet bilaterale do të mund të mbaheshin çdo ditë tjetër. Jemi fare afër njëri-tjetrit si vende. Nuk do të ishte hera parë që do të takoheshim brenda ditës. Por është hera parë që një mbledhje e përbashkët anulohet në mënyrë të njëanshme”, - është shprehur zëdhënësi i Qeverisë së Kosovës.
Por sipas Ramës, mbledhja nuk mund të mbahej sipas formatit të planifikuar.
“Ky takim nuk mund të mbahet në formatin e parashikuar dhe pasi kam folur pasdite me shefin e diplomacisë evropiane, Josep Borrell, i kam kërkuar Albinit për t’u takuar nesër, në Gjakovë, në një format më të ngushtë, përkatësisht me ministrat e Jashtëm dhe ata të Mbrojtjes për të diskutuar pikërisht për këtë situatë.” – deklaroi Rama duke shtuar se kryeministri i Kosovës nuk e kishte pranuar këtë format, por kërkoi mbajtjen normale të mbledhjes së dakordësuar më herët. ©LAPSI.al
