Për gati 10 orë, nga ora 8 e mëngjesit deri në 20.00 të mbrëmjes është pyetur në SPAK, Aishe Haklaj. Motra e vëllezërve Haklaj ka dhënë dëshminë e saj për një kallëzim penal që babai i saj, Muharremi dhe motra Zylfia kanë bërë ndaj ish-kryeministrit Sali Berisha për vrasjen e 4 djemve të familjes. Ajo është shkëpëtur për vetëm një moment kur ka marrë telefonin e saj ku pretendonte se në të kishte prova për t'ja paraqitur hetuesve.
Provat janë dorëzuar dhe për secilën prej tyre është mbajtur procesverbal. Pasi ka përfunduar marrjen në pyetje, Haklaj ka shkëmbyer disa fjalë me avokatin e saj Idajet Beqiri në oborrin e SPAK ndërsa ka bërë një prononcim për mediat.
“Me gjithë respektin e madh për mediat që keni kryer detyrën tuaj dhe keni qenë pushteti i vetëm të cilët kemi mundur t’i drejtohemi deri tani. Besimi ynë është ende në SPAK dhe GJKKO. Nuk mund të them më shumë sepse edhe sekretet edhe gjithçka duhet të ruhet. Ne kemi këtu njeriun e besuar të familjes, avokatin Idajet Beqiri që ndoshta do t’ju japë më shumë”, - tha Aishja.
Ajo jeton në Suedi dhe gjatë qëndrimit në Tiranë raportohet se është shoqëruar nga forca të policisë. Sipas të njëjtave burime ajo nuk do të vizitojë Tropojën, por do të kthehet menjëherë në Suedi. Atje jeton edhe motra e saj, Zylfija që ka fituar azil politik. Ajo nuk mund të kthehet në Shqipëri pasi për të ka një urdhër-arresti për vrasjen e Rasim Lumneshit. ©LAPSI.al
