Komiteti i Marrëdhënieve me Jashtë i Senatit amerikan ka miratuar ditën e sotme kandidaturën e diplomatit David Kontelancik për të qenë ambasadori i Shteteve të Bashkuara të Amerikës në Shqipëri.
Ai ka një karrierë të gjatë në diplomaci dhe ka punuar më herët edhe në Ambasadën amerikanë në Tiranë.
Gjatë seancës dëgjimore në fundin e muajit mars, Kostelancik u shpreh se është i duhuri për të qenë ambasadori i ri në Shqipëri, bazuar në eksperiencës 30 vjeçare dhe dëshira e madhe për të përforcuar partneritetin SHBA- Shqipëri.
Kostelancik e cilësoi si qëllim kryesor të SHBA luftën ndaj korrupsionit në vendet e Ballkanit Perëndimor.
Biografia
David Kostelancik ka shërbyer në Shqipëri edhe më përpara në periudhën 1992-1994, si përfaqësuesi i parë për çështjet politike dhe ekonomike në Ambasadën e porsahapur amerikane në Tiranë.
Para emërimit si ambasador, i shërbente si këshilltar për Politikën e Jashtme i shefit të Shtatmadhorisë amerikane, gjeneralit Mark Milley.
Kostelancik është një diplomat me një karrierë 30-vjeçare, ku ka shërbyer dy herë në Ambasadën amerikane në Moskë, në misionet e SHBA-së në OSBE dhe NATO, si edhe në Ankara të Turqisë.
Diplomati Kostelancik, me origjinë nga shteti i Ilinoit, është diplomuar në Universitetin Northwestern të këtij shteti. Ai flet rusisht, hungarisht, shqip dhe turqisht.
