Dalin detaje të reja nga vrasja e 38-vjeçares shqiptare Anila Ruçi e cila u gjet e vrarë me thikë pasditen e së mërkurës në shtëpinë e saj në një provincë të Pavias në Itali. Dyshimet janë hedhur mbi bashkëjetuesin e saj Osman Bilyhu, 38 vjeç, i cili u gjet pa ndjenja në oborrin e banesës.
Gruaja që punonte si kujdestare për të moshuarit e kishte prezantuar këtë person tek fqinjët si vëllain e saj, por policia tha se nuk ka gjetur prova që ata ishin të afërm. Të njohurit thanë se mes tyre kishte pasur shpesh herë zënka.
Megjithatë ende nuk ka një akuzë ndaj 38-vjeçarit i cili ndodhet në terapi intensive pasi edhe ai kishte plagë thike në bark, gjoks dhe krahë. Ai nuk është marrë ende në pyetje për shkak të gjendjes shëndetësore dhe sepse ai nuk flet italisht.
Ishte pikërisht ai që njoftoi për ngjarjen e rëndë. Ai u shfaq në një lokal pranë banesës ku u kërkoi punonjësve dhe klientëve të njoftonin urgjencën. Më pas ai u largua drejt banesës, por humbi ndjenjat në oborr. Kur ekipi i emergjencës hyri në banesë gjetu gruan shqiptare të pajetë në divan të mbuluar me një çarçaf.
Ajo ishe goditur me thikë në fyt. 38-vjeçarja jetonte në atë banesë prej një viti e gjysmë. Verën e kaluar asaj iu bashkua edhe Bilyhu. Ai mundi të thoshte vetëm se rreth orës 5 të mëngjesit një person i panjohur hyri në banesë, por është ende e paqartë pse krimi u njoftua 12 orë më pas. Ky është një element ende për t'u verifikuar. As arma e krimit nuk është gjetur ende. ©LAPSI.al
