Ish-kryeministri Sali Berisha tha sot se PD do bëjë gjithçka që projekti i Portit të Durrësit të anulohet. Ai tha se ky projekt është ndoshta vjedhja më e madhe në të gjithë historinë e Europës.
“Vjedhje me 820 mijë metër katrorë tokë publike, me sipërfaqen ujore në vazhdim me 12 mijë apartamente që do ndërtohen kap vlerën 5 mld euro. E gjithë kjo vjedhje e madhe ka vetëm një qëllim, të bëjë miliarder vetëm Edi Ramën. Natyrisht të shtojë miliardat tek Alabari i Edi Ramës. Në mënyrë absolute nuk do lejohet. Do fillojnë denoncimet. Ju keni parë përgjigjet kategorike të Varhelyit i cili shprehet se respektimi i marrëveshjes së stabilizim-asocimit është detyrim. Ndaj do bëjmë gjithçka që të anulohet”, tha Berisha.
Lidhur me draftin e PD për heqjen e parashkrimit të veprës penale për zyrtarët e lartë, Berisha tha se ligji i dërguar në parlament do ketë efekte prapavepruese, nga 31 marsi i vitit 1991 dhe në vazhdim.
“Lidhur me hetimin, ju e dini se unë kam dërguar në parlament një ligj që heq parashkrimin për ministrat, kryeministrat, të gjithë zyrtarët që firmosin për prokurimet publike. Sigurisht ligjin Edi Rama nuk e pranon. Zotimi im solemn është se ai ligj do votohet në javët apo muajt e parë të mandatit të parë. Ai ligj është jetik. Parashkrimi iu lejon atyre të krijojnë parajsa përrallore për veten dhe familjarët e tyre. Parashkrimi do ketë efekte prapavepruese, nga 31 marsi i vitit 1991 dhe në vazhdim”, tha Berisha.
