Kanë dalë detaje të reja nga atentati me eksploziv që u shënua pas mesditës së të hënës në Shkozet të Durrësit. Siç dihet një automjet shpërtheu në ecje e sipër, por fatmirësisht drejtuesi i cili ndodhej i vetëm në makinë ka shpëtuar pa lëndime.
News 24 raporton se i pari që është marrë në pyetje është pikërisht 37-vjeçari, Aldi Mustafa i cili ishte shënjestër e atentatit. Në pyetje janë marrë edhe dëshmitarë të ndodhur në vendin e ngjarjes. Dyshohet se shpërthimi mund të ketë qenë i telekomanduar.
Sipas të njëjtave burime, shpërthimi ka ndodhur vetëm pak çaste pasi 37-vjeçari kishte lënë në banesë gruan me fëmijët. Lënda eksplozive ishte vendosur në gomën e pasme të automjetit. Në vendin e ngjarjes në Shkozet kanë shkuar ekspertë të kriminalistikës.
Aldi Mustafa rezulton të jetë një person me precedentë penalë. Të njëjtat burime thonë se ai njihet si mik i “Rrumit të Shijakut”. Ai është arrestuar më 30 gusht të 2021 me dy të tjerë, të akuzuar se po planifikonin një vrasje.
Banues në Durrës, ai është dënuar më parë për veprat penale “Kanosja” dhe “Prodhimi dhe shitja e narkotikëve” ndërsa është dënuar edhe me 10 vite burg në Gjermani. ©LAPSI.al
