Një gjest i lojës së ndershme në futboll vjen, edhe një herë, nga një fushë e futbollit amator. Këtë herë nga Bonate Sotto (Bergamo), pas atij në Teramo. Gjatë ndeshjes së kampionatit rajonal nën 17 vjeç, grupi C, mes Accademia Isola Bergamasca (AIB) dhe Olympic Morbegno, me rezultatin 1-1, erdhi momenti i sportivitetit, siç tregon L'Eco e Bergamos.
Një lojtar i skuadrës mike, në mesin e pjesës së parë, u rrëzua në fushë i dëmtuar duke rënkuar nga dhimbjet. Por loja vazhdoi dhe topi mbërriti në duart e portierit vendas, Francesco Rottoli. Ai u përgatit për rivënien, ndërkohë që kapiteni i tij Giorgio Locatelli ngriti dorën për ta ndaluar lojën. Ai e mori topin në dorë, i bindur për ndalimin e lojës për t'i dhënë ndihmën të dëmtuarit. Por nuk ishte kështu. Erdhi fishkëllima e arbitrit, për një penallti në favor të miqve. Atyre fitorja do t'u sillte frymëmarrje në renditje e megjithatë ndodhi e paimagjinueshmja. “Godite jashtë, nxirre jashtë” u dëgjua thirrja nga tribuna.
Ai që e kërkoi këtë gjest të madh sportivitetit ishte tekniku i ekipit Olympic Morbegno, Gianluca Scisetti. Ai kërkoi të nxirrej jashtë topi i pozicionuar në pikën e bardhë të zonës së AIB. Scisetti e ndiqte ndeshjen nga tribuna për shkak të një skualifikimi. E ai që goditi penalltinë, Andrea Rizzi, iu bind trajnerit, duke e dërguar topin jashtë. Duartrokitje nga të gjithë të pranishmit.
Lexo më tej: It’s coming home… çmimi Fair Play: Anglia skuadra më “e mirë” e Katar 2022
NDERIMET E KUNDËRSHTARIT
Në fund Accademia Isola Bergamasca e mundi Olympic Morbegno nga Valtellina 5-1, por miqtë u larguan nga fusha me kokën lart, me të gjitha nderimet për atë akt të shkëlqyer sportiv të kryer në mesin e pjesës së parë. “Një gjest i lojës së ndershme që duhet treguar, sepse futbolli dhe sporti janë edhe ky. Edukim në solidaritet, ndershmëri dhe respekt”, shkruan Akademia Isola Bergamasca në faqet e saj sociale, duke rrëfyer episodin dhe duke u kthyer për të përgëzuar Olympic Morbegno.
