Aplikacioni i mediave sociale TikTok, është ndaluar nga telefonat dhe tabletët e qeverisë britanike në një masë sigurie "paraprake".
Bllokimi vjen pas lëvizjeve të ngjashme nga Shtetet e Bashkuara dhe Komisioni Evropian, pasi marrëdhëniet midis vendeve perëndimore dhe Pekinit vazhdojnë të përkeqësohen. Qeveria e Mbretërisë së Bashkuar ka frikë se të dhënat e mbajtura në telefonat zyrtarë mund të aksesohen nga qeveria kineze. “Ne po kalojmë në një sistem ku pajisjet qeveritare do të jenë në gjendje të hyjnë vetëm në aplikacionet e palëve të treta që janë në një listë të para-miratuar”, tha ministri i Zyrës së Kabinetit, Oliver Dowden në Dhomën e Komunave. “Ne gjithashtu do të ndalojmë përdorimin e TikTok në pajisjet qeveritare. Ne do ta bëjmë këtë me efekt të menjëhershëm.”
TikTok, nga ana tjetër deklaroi se ishte "i zhgënjyer" me vendimin dhe tha se ndalimet bazoheshin në "keqkuptime themelore dhe të nxitura nga gjeopolitika më e gjerë".Kina i bëri jehonë kësaj, me ambasadën e saj në Londër duke thënë se vendimi "ndërhyn në operacionet normale të kompanive përkatëse në MB dhe në fund do të dëmtojë vetëm interesat e vetë Mbretërisë së Bashkuar".
Ndalimi nuk mbulon pajisjet personale – duke përfshirë ato të përdorura nga ministrat e qeverisë ose deputetët – dhe do të ketë përjashtime kur aplikacioni kërkohet në pajisjet zyrtare për arsye operacionale. Disa ministra të qeverisë, duke përfshirë Grant Shapps dhe sekretaren e teknologjisë Michelle Donelan, drejtojnë llogaritë e tyre të TikTok. Z. Shapps, i cili ka 14,400 ndjekës në platformë, tha se ndalimi i pajisjeve qeveritare ishte "i arsyeshëm", por se ai do të vazhdonte llogarinë e tij në pajisje të tjera./Lapsi.al
Marrë nga: Independent
