Pas depozitimit të kërkesës në KQZ të koalicionit “Bashkë fitojmë” të PD-së së Berishës dhe 3 partive të tjera opozitare ka ardhur reagimi i grupimit “Alibeaj”. Vetë ky i fundit thotë se kjo është një shkelje e rëndë pasi po u keqpërdoret sigla dhe emri i partisë.
“Depozitimi në KQZ për regjistrimin e koalicionit “Bashkë fitojmë” përmban një shkelje të rëndë lidhur me përdorimin e siglës dhe emrit të PD. Ky përdorim, i shkruar në një dokument zyrtar që ndodhet aktualisht në KQZ, është në kufijtë e një vepre penale. PDSH nuk është regjistruar ende në KQZ, kjo falë tifozërisë politike të drejtuesit të saj.
Në cilësinë si kryekomisioner, Celibashi duhet të marrë masa urgjente për të shmangur regjistrimin e një koalicioni që përdor në mënyrë të paligjshme logon dhe simbolet e PD. Partia Demokratike mbetet në pritje të vendimit të nesërm të KAS. Çdo përdorim juridik në KQZ apo në institucione të tjera i emrit, siglës apo logos së saj është shkelje e Kodit Zgjedhor dhe mashtrim për zgjedhësit” – thotë Alibeaj. ©LAPSI.al
