Duke folur për mundësinë e arritjes së marrëveshjes për normalizim ndërmjet Kosovës dhe Serbisë, presidenti serb Aleksandar Vuçiç ka thënë se nuk do të nënshkruajë kurrë për kapitullimin e Serbisë. Ai ka akuzuar Albin Kurtin se nuk është i gatshëm të nënshkruajë ngritjen e Asociacionit.
Duke folur për vizitën e emisarit të BE-së për dialogun, Miroslav Lajcak, Presidenti i Serbisë ka thënë se është vështirë të shënohet ketë progres.
“Kurti është i vendosur që të mos e themelojë Asociacionin. Liberalizimi i vizave është inkurajim për Kurtin. Lajçak do të jetë në Beograd të hënën dhe ne do të tentojmë që të shënojmë progres për normalizimin e marrëdhënieve”, - ka thënë Vuçiq për mediat serbe.
“Do ta kem një takim gjysmë-orësh, dhe pastaj de-fakto do të jem me të për 2 ditë për ta gjetur një zgjidhje”, - ka deklaruar kreu i shtetit serb.
“Nuk do të ndodh kurrë që unë ta nënshkruaj kapitullimin e Serbisë. S’do të ketë as kapitullim e as dorëzim. Në mënyrë të vendosur kam thënë para të gjithëve se Serbia nuk do të pajtohet për anëtarësimin e Kosovës në OKB, e as nuk do ta njohim pavarësinë e saj në një mënyrë apo tjetrën”, - ka deklaruar ai. Vuçiç ka thënë se Serbia është e gatshme të bëjë kompromise, ndërsa shqiptarët nuk janë. ©LAPSI.al
