Një vajzë ruse 12-vjeçare bëri një vizatim kundër luftës në Ukrainë në shkollë dhe për këtë arsye u internua në një institucion "rehabilitimi social". Emri i vajzës është Masha Moskaleva. Ajo jeton në qytetin Efremov, në rajonin Tula dhe në vizatimin e saj ajo tregonte një grua me një vajzë të vogël në dorë, raketa që udhëtonin në drejtim të flamurit ukrainas, me mbishkrimin “Unë jam kundër luftës”. Sipas mediave ruse për shkak të këtij vizatimi që “diskrediton ushtrinë”, Masha do të vijojë të mbahet në qendrën korrektuese.
Vizatimi u realizua në prill 2022, një muaj pas pushtimit rus, gjatë një mësimi të artit në shkollë, ku nxënësve iu kërkua të pasqyronin "operacionin special" dhe mbështetjen për trupat ruse. Por vizatimi i Mashës nuk i pëlqeu mësuesit që e denoncoi të voglën.
Në këtë çështje u përfshi edhe babai i saj, Alexey Moskalev, i cili përfundoi në “arrest shtëpie” pasi u përpoq të mbronte vajzën e tij. Svetlana Davydova, drejtore e Komisionit për çështjet e të miturve të qytetit të Efremov, shpjegoi për RBC se ishte zyra e saj që hapi një dosje janarin e kaluar për të kufizuar të drejtat prindërore të babait. Ai konsiderohet fajtor për diskreditimin e forcave ushtarake të vendit. Ndërsa nëna e vajzës, e cila jeton në një qytet tjetër (pasi është larguar nga familja kur vajza e saj ishte 3 vjeç), nuk ka pasur asnjë problem me drejtësinë ruse.
Avokati i Alexey Moskalev deklaroi se ai nuk ka marrë asnjë komunikim në lidhje me një padi kundër klientit të tij, i cili megjithatë është i burgosur në shtëpi. Askush, madje as fqinjët, nuk janë të autorizuar t'i dërgojnë atij ushqime ose ta ndihmojnë për nevojat themelore. Sipas gjykatës së Efremov, vetëm autoritetet ruse dhe avokati mund të kenë kontakt me Moskalev. Sipas organizatës së pavarur Ovd-Info, Masha është një nga 8 të miturit që kanë pasur pasoja ligjore në Rusi që nga fillimi i luftës. ©LAPSI.al
