Para se të mbyllte fjalën e tij në Kuvend, kryeministri Edi Rama ka dhënë një paralajmërim. Ai tha se në Departamentin Amerikan të Shtetit po përgatitet shpallja e një tjetër politikani me rëndësi në Shqipëri "non-grata". Rama tha se ajo që opozita e mendon si "byrektore", referuar Departamentit Amerikan të Shtetit, është duke e bërë punën. Për emrin e këtij politikani që po "gatuan" DASH, kryeministri tha se nuk duhet të presim gjatë.
"Deri atëherë, kujdes se byrektorja vijon punën. Gjiza ka arritur dhe okllaia po ushtron brumin tjetër për tavën që pret të hyjë në furrën e rindezur. Personin në fjalë do e shihni vetë."-,tha Rama.
Me këto fjali kryeqeveritari përfundoi deklaratën e tij 45 minutëshe para Kuvendit në interpelancën e kërkuar nga opozita, dhe u largua nga salla.
