Teksa kryeqyteti u trondit dje nga vrasja e 3 grave dhe plagosja e 3 të tjerave nga i njëjti autor, zbardhen të tjera detaje që vënë në pikëpyetje vendimet e gjykatave shqiptare. Gazetarja Klodiana Lala, duke e cilësuar skandal rastin në fjalë, pohoi se Dan Hurta ndoshta nuk do t’i kishte kryer këto krime dje, nëse do të ishte gjykuar siç e përcakton ligji nga gjykata e Durrësit.
40-vjeçari ishte arrestuar dhe akuzuar për një vjedhje në qytetin e Durrësit, ndërkohë që prokurori kishte kërkuar për të masën ‘arrest me burg’. Pavarësisht këtij fakti, gjykata e Durrësit vendosi që ta lërë atë me ‘detyrim paraqitje’.
Mes të tjerash Lala, duke iu referuar procedurave ligjore që duhet të ndiqen në rastin e një personi me precedentë të tilla penale, që lirohet nga burgu, theksoi se këto raste duhet të mbikëqyren. Sipas saj, është një strukturë e posaçme në Polici, ku policë të zonës duhet të mbikëqyrin personazhe të tilla, që konsiderohen problematikë. Por duket se në këtë rast, autori është lënë totalisht i lirë, duke zbatuar planet e tij që tha se i kishte menduar që në burg, ku qëndroi herën e fundit 8 muaj nën akuzën për dhunë në familje.
