Tre pikë avantazh që duhen ruajtur me cdo kusht, në mos thelluar edhe më shumë. Në vigjilje të përplasjes në derbin me Partizanin, që mund të thotë shumë për titullin, ky është qendrimi te Tirana. Bardheblutë i kanë të qarta idetë dhe, në krahasim me të kuqtë, në ndihmë i vjen edhe kalendari.
Mes ngjeshjes së ndeshjeve mesjava e Kupës së Shqipërisë i jep luksin Orges Shehit të ketë mundësinë të freksojë skuadrën. Kjo nuk vlen për italianin Colella, kur të zgjedhë formacionin për sfidën e 1 marsit në vajtjet e çerekfinaleve. E thënë më ndryshe, bardheblutë në letër kanë kalendarin më të mirë në raport me ndjekësin direkt. E Shehi do të tentojë ta shfrytëzojë në maksimum.
Në javën e 23, kryesuesit e kampionatit do të presin Teutën në shtëpi. Një përplasje sigurisht më komode se të luash transfertën e Kukësit, edhe pse të dyja skuadrat janë në zonën e rrezikut. Bardheblutë e dinë mirë se përballë tyre mbërrin një skuadër që në 9 ndeshjet e fundit ka vetëm një humbje. Teuta, për më tepër, i kanë mundur në fazën e dytë 1-0. Por kampionati dihet nuk ka më ndeshje të lehta dhe për të pretenduar distancimin nga ndjekësit Tirana duhet të fitojë.
DIFERENCA NË MESJAVËN E KUPËS
Favori pastaj, nëse mund të quhet i tillë i një skuadre pa shumë pankinë, është se në mesjavën e Kupës kryeqytetasit luajnë me Kastriotin e vendit të fundit. Kalendari, nga ana tjetër, të kuqtë i përplas me Vllazninë. Rivalë për titull e ambicjozë për Kupën, ajo në Shkodër nuk ka si të jetë e lehtë.
Shehi mund të bëjë ndryshime përballë një kundërshtari si Kastrioti. Më shumë se te Kupa, krutanët duhet të mendojnë për përpjekjet titanike që i duhen për të shpëtuar. Colella, nga ana tjetër, pavarësisht se ka pozicione të dubluara, vështirë se mund të dëshirojë të rrezikojë. Kështu, në vajtjen e cerekfinales, asnjë eksperiment për italianin. Dy transferta radhazi për të e pastaj derbi kryeqytetas. Tirana shpreson që në sfidën titull të ketë komoditet renditje e pikësh. Pa harruar pastaj se Partizani do të ketë një triadë përplasjesh radhazi me rivalët: dy me shkodranët e derbin me Tiranën.
