Kreu i Partisë Demokratike, Sali Berisha ka zhvilluar një komunikim për mediat ku ka akuzuar kryeministrin Edi Rama si të korruptuar dhe se për të qëndruar në pushtet, grabit qytetarët shqiptarë.
“Këto protesta janë fillesat e një revolucioni. Edi Rama organizoi 753 protesta me regjistër, por nuk realizoi dot asnjë të vetme pasi iku nga bashkia. Ishin protesta të qeveritarëve, të zyrtarëve dhe jo të qytetarëve të revoltuar. U ndala këtu për të theksuar një moment që fillimi është shumë i mirë. Imagjinoni sakrificën e njerëzve që bëhet për të mbushur sheshet sa më parë”, tha Berisha.
Sipas tij “Mosbindja civile është element thelbësor i revolucionit paqësor. Ne kemi një përqindje të madhe të popullatës që e urren Edi Ramën dhe kemi një % tjetër që na përgjigjet dhe del në protestë. Por pjesa tjetër kërkon të shohë shembuj të tjerë tek ne. Duhet t’i japim mesazh të qartë anëtarësisë sonë, sakrificat i kemi përpara. Këtu skandalet kanë qenë ligjësi të përjavshme, ndaj dhe duhet të ndërmarrë një debat intensiv me anëtarësinë tonë dhe mbështetësit tanë. Është e domosdoshme sot kryetarë grupesh të organizojmë mbledhjet me Kryesitë e degëve, seksione, takime intensive të hapura me qytetarët”.
