“Jam shumë i kënaqur, uroj Laçin si skuadër dhe klub me objektiva të mëdha. Ishte një ndeshje e fortë, por ne e përqëndruam shumë mirë. I duartrokas shumë futbollistët e mi". Naxhi Shensoi i gëzohet fitores së tretë në 5 ndeshje që kur është në Ballsh. Bylis ia doli të fitojë në transfertën e Laçit, që synonte zonën europiane. Në këtë pikë, tekniku kosovaro-turk ka komplimentuar skuadrën e Mezanit, pavarësisht se e ka zhytyr në telashe, duke e tërhequr në ujëra të turbullta.
Teknikun Shensoi, ka dashur madje të justifikojë humbjen në shtëpi me Partizanin. E bën me krahasimin më pak të gjetur, por duke justifikuar disfatën ndaj të kuqve: "Laçi ishte më shumë agresiv ndaj nesh - tha Shensoi -. Jemi në situatë që çdo ndeshje për ne është një finale. Ne synojmë të mbijetojmë. Çdo gjë ndodh në futboll, mund të humbasësh edhe në shtëpi. I ndodh dhe Barcelonës dhe Realit, tradita ekziston në sport, por një ditë gjërat mund të ndryshojnë”, e mbylli Shensoi.
MEZANI SHPËRTHEN KUNDËR QENDËRMBROJTËSVE
“Kemi gabuar në pjesën e parë. Dy lojtarët tanë në qendër të mbrojtjes ku pësuam golin, ishin jashtë pozicionit. E kishim organizuar ndryshe, asnjëri prej tyre nuk ishte në vendin e duhur. Nuk do ta kalojmë normalisht këtë". Gentian Mezani nuk e kapërcen dot humbjen e dytë radhazi në shtëpi e për më tepër mënyrën. Ruçi i vetëm pa praninë e mbrojtësve për metra të tërë nuk është në konceptin që tekniku ka për futbollin. "Më vjen keq pasi ekipi nuk po reagonte - vazhdoi ai -. Kemi humbur 6 pikë në fushën tonë dhe nuk kemi bërë maksimumin për të marrë pikët e plota. Kampionati po bëhet më i vështirë, ndeshjet po pakësohen. Por si duket disa çuna nuk e kanë kuptuar akoma që gjithçka varet nga këmbët e tyre” përfundoi Mezani.
