Ministri i Drejtësisë, Ulsi Manja tha se Partia Socialiste do të dorëzojë në SPAK kallëzimin për vrasjet e 21 Janarit bazuar në përgjimet që pretendojnë se janë në kasetën e publikuar nga gazetari Artan Hoxha.
Manja akuzoi direkt ish-kryeministrin Sali Berisha dhe kujtoi deklaratat e tij se nëse do kishte qenë sërish në të njëjtat rrethana do të kishte marrë snajperin për të vrarë kreun e opozitës në atë kohë, Edi Ramën.
“Nuk di nëse ka ndonjë rast ku hetohen protestues të lirë si organizatorë të vrasjeve ndërsa ish kryeministri thotë i vrau gardën për të mbrojtur godinën e kryeministrisë. Dhe thotë që në të njëjtat kushte do kishte marrë snajperin dhe vetë dhe do kishte vrarë ish kryetarin e opozitës Edi Rama.
SPAK ka sprovën e vet për të treguar që është në lartësinë e detyrës që i ka ngarkuar kushtetuta dhe ligji. Sot do ta dorëzojmë kallëzimin. Kallëzimi do të drejtohet në SPAK dhe administrimi i kasetës si provë. Nuk mundet kurrsesi të barazohet urdhërdhënesi me protestues dhe qytetarë që kanë protestuar dje, protestojnë sot dhe do protestojnë edhe nesër”, deklaroi Manja.
