Napoli vazhdon të shijojë një sezon ëndrrash dhe kreun vetmitar në Serie A. Por gjërat mund të mos jenë gjithnjë kaq rozë. E në fakt, klubi po ndjek i shqetësuar zhvillimet e hetimeve për çështjen Osimhen. Prej muajsh, në fakt, prokuroria e kryeqendrës kampane ka hetuar shitjen e nigerianit. Konkluzionet e para janë ato të komunikimeve të rreme në pasqyrat financiare. Në këto orë po filtron lajmi se puna e hetuesve do të zgjatet edhe për gjashtë muaj. E pasi të ketë përfunduar aktiviteti hetimor, prokuroria e FIGC do të kërkojë akses në dokumente.
Nëse nga dokumentet dalin prova të reja, avokati Chiné mund të kërkojë rihapjen e gjyqit, siç ndodhi në rastin e Juventusit. Pozicioni i Napolit, si ai i bardhezinjve, ishte arkivuar tashmë në maj me shpalljen e pafajësisë nga Gjykata Federale e Apelit. Siç raporton Repubblica, sipas Gino Fabio Fulgeri, avokatit që ndihmon Aurelio De Laurentiis në çështje penale, “Napoli është i bindur se mund të tregojë rregullsinë e operacionit. Për më tepër që është i vetmi për të cilin ka hetime”.
Lexo më tej: Kërcënime me vdekje për prokurorin Chiné: në shënjestër të tifozëve të Juventus edhe Gravina e shoqja e tij
ÇFARË PËRFSHIN HETIMI
Numri një i klubit, gruaja e tij, fëmijët Valentina dhe Eduardo, dhe CEO Chiavelli, u përfshinë në regjistrin e të dyshuarve më 21 qershor. Blerja e Osimhen dhe operacioni janë në qendër të hetimit në të cilët ishin të përfshirë katër lojtarë të tjerë. Bëhet fjalë për portierin Karnezis dhe tre lojtarë të rinj, Liguori, Palmieri dhe Manzi. Vlera totale e tyre shkon mbi 21 milionë euro dhe aktualisht luajnë në liga të vogla dhe kampionate amatore. Guardia di Finanza ka qenë në punë prej muajsh duke analizuar të gjithë dokumentacionin. Krahas krimit të komunikimeve të rreme në pasqyrat financiare, ekziston edhe hipoteza e deklarimit mashtrues. Një vepër që lidhet me një pjesë të shumës së paguar te Lille, për të cilën nuk është paguar 4.6 milionë tatimi mbi vlerën e shtuar.
