Presidenti Bajram Begaj ka kthyer për rishqyrtim ndryshimet në ligjin për dhënien e dekoratave nga institucioni i Kreut të Shtetit.
Në sqarimin e tij, Presidenti thotë se dhënia e dekoratave është një kompetencë Kushtetuese e Kreut të Shtetit.
Sipas tij, ndryshimet ligjore të miratuara në seancën e fundit parlamentare të vitit të kaluar, duan të çojnë në kufizimin e kompetencave të Presidentit.
“Përcaktimi numerik në nenin 22, të ligjit 93/2022, për numrin e dekoratave që jepen nga Presidenti i Republikës (brenda vitit kalendarik), në mungesë të një studimi/analize të detajuar, justifikuese ligjore-teknike të dhënë në relacionin shoqërues të ligjit të miratuar nga Kuvendi, “Për dekoratat në Republikën e Shqipërisë”, konsiderohet si një element përmbajtësor, që çon në kufizimin e kompetencës kushtetuese të Kreut të Shtetit, në këtë rast.
Kemi një ngushtim të kompetencës kushtetuese të Presidentit për dhënien e dekoratave nëse analizojmë me kujdes përmbajtjen e neneve të projektligjit “Për dekoratat në Republikën e Shqipërisë” – sqaron ndër të tjera Begaj.
