Arlind Gjokutaj, Sekretari i Përgjithshëm i Ministrisë së Financave që u arrestua sot për mashtrim, e ka marrë këtë detyrë në tetor të vitit 2021. Më herët, ka qenë në krye të Drejtorisë së Përgjithshme të Doganave. Gjokutaj drejtonte edhe Drejtorinë e Përgjithshme e Parandalimit të Pastrimit të Parave, post të cilin e mbante që prej marsit të vitit 2017.
Ai ka ushtruar disa detyra të rëndësishme si Koordinator i Posaçëm për ekonominë, pranë Këshillit të Ministrave, dhe ekspert i çështjeve fiskale dhe monetare në Bankën e Shqipërisë. Gjithashtu, është angazhuar si lektor i jashtëm në Universitetin e Tiranës dhe në disa Universitete private. Është certifikuar si Trainer of Trainer në fushën e Antikorrupsionit dhe mirëqeverisjes nga OSBE, Shkolla Italiane e Administratës Publike dhe ASPA.
Tashmë Gjokutaj akuzohet për shpërdorim detyre. Ai është vënë në pranga bashkë me dy zyrtarë të tjerë të MF-së, përmbaruesi Alban Ruli dhe drejtori i Ministrisë së Financave, Fatmir Hoxha. Të tre akuzohen se i kanë shkaktuar 1.2 milion euro (1.5 miliardë lekë) dëme shtetit. Arrestimi është kryer ditën e sotme, një muaj pas vënies në pranga të qytetarit Ilir Thana, të cilin akuzohen se e kanë ndihmuar të përfitonte disa herë rimbursime nga paratë e shtetit për një godinë dhe një truall.
