Këtë të premte mbahen zgjedhjet për kreun e SPAK. Tre kandidatët në garë janë Edvin Kondili, Adnan Xholi dhe Altin Dumani. Sipas Kushtetutës, kreu i SPAK-ut zgjidhet me shumicën e anëtarëve të Këshillit të Lartë të Prokurorisë. Ai ka mandat 3-vjeçar, pa të drejtë rizgjedhjeje.
KLP-ja, në zgjedhjen e kreut të SPAK, do të vlerësojë 7 kritere. Ato janë: eksperienca në ndjekjen dosjeve sensitive të korrupsionit dhe krimit të organizuar, eksperiencën dhe aftësitë në organizimin dhe drejtimin e një strukture, eksperiencën në hartimin e miratimin e rregulloreve administrative, eksperiencën në çështje të cilat kanë marrë vëmendje të lartë publike dhe ndërveprim me median, aftësitë në drejtimin të burimeve njerëzore, vizionin për drejtimin e SPAK si dhe imazhin që ka në publik si prokuror.
11 anëtarët e KLP-së për zgjedhjen e kreut të SPAK janë Alfred Balla, Tartar Bazaj, Arta Mandro, Bujar Sheshi, Eloida Goxhi, Esmeralda Cami, Ledina Riza, Mirela Bogdani, Nurihan Seiti, Sokol Stojani dhe Zeqir Hoda. Në rast se dy a më shumë kandidatë marrin numër të barabartë votash, KLP kryen një votim të dytë. Votimi bëhet mes kandidatëve me numër të barabartë votash.
