Kryeministri i vendit, Edi Rama ka lajmëruar të gjithë ndërtuesit e pallateve pa leje se shembjet do të vijojnë. Përmes një postimi në Twitter, Rama i bëri thirrje Gjykatës Kushtetuese që mos “lajthisë” lidhur me ankesën që ka bërë Shoqata e Ndërtuesve.
"Shoqata e Ndërtuesve qenka ankuar në Gjykatën Kushtetuese pse po goditen rëndë pallatet me shkelje të lejeve të ndërtimit! Le të shkojnë edhe në Hagë ose në hënë po të duan. Pallatet me shkelje do prishen ose do konfiskohen për interes publik prandaj uroj që GJK të mos lajthisë!", shkruan Rama.
Ditën e sotme Inspektorati Kombëtar i Mbrojtjes së Territorit ka nisur prishjen e një pishine dhe ndërtimeve të tjera shoqëruese pranë detit në Golem. Kjo pjesë i përkiste Hotel Kastrati Empire.Pak ditë më parë IKMT shembi me shpërthim të kontrolluar edhe objektin e 'Hotel Prestige' në Durrës. Ky veprim erdhi disa muaj më parë kishte shembur pishinën e këtij objekti. 'Prestige Resort' u shemb duke përdorur 70 kilogramë lëndë shpërthyese si dhe 4 mijë metër linear fitil.
