Kryeministri Edi Rama sërish ka reaguar për ngjarjet në veri të Kosovës. Në një aktivitet të zhvilluar këtë të hënë, ku po prezantohet projekti i ri tregtar i Durrësit në Porto Romano, kryeministri Edi Rama tha se qeveria e Kosovës ka të gjithë mbështetjen e qeverisë shqiptare.
“Së pari dëshiroj të përshëndes kryeministrin Kurti dhe kryeministrin Kovaçevski. Të dy e patën të pamundur të ishin sot këtu për arsye angazhimesh. Në rastin e kryeministrit të Kosovës e merrni vetë me mend që pamundësia është e lidhur me situatën e krijuar së fundmi në veriun e Kosovës. Situatë në të cilën qeveria e republikës së Kosovës dhe Republika e Kosovës kanë të gjithë solidaritetin, mirëkuptimin dhe mbështetjen e qeverisë tonë dhe Republikës së Shqipërisë”, tha Rama.
