Kërkesat për shtyrjen e zgjedhjeve të 18 dhjetorit në katër komunat e veriut të Kosovës, po shtohen për çdo ditë. Përveç insistimit amerikan për shtyrjen e tyre, për shkak të situatës së brishtë të sigurisë, kërkesës i është bashkuar edhe Gjermania.
Ndërkohë, Gazeta Express ka mësuar nga burime të saj që presidentja e Kosovës, Vjosa Osmani u ka dërguar ftesa liderëve të partive politike parlamentare për t’u takuar sot në ora 14:30. Në këtë takim do të diskutohet situata e sigurisë në veri dhe pengesat që janë paraqitur për të garantuar një proces të sigurt zgjedhor në katër komunat veriore.
