“Shqipëria duhet të heqë dorë nga skema e pasaportave të arta për investitorët, pasi një gjë e tillë do të paraqiste rreziqe, pasi ka të bëjë me sigurinë, pastrimin e parave, evazionin fiskal, financimin e terrorizmit, korrupsionin dhe infiltrimin e krimit të organizuar. Do të ishte e papajtueshme me normat e BE-së”, kështu thuhet në draft raportin e Komisionit Evropian.
Kjo nuk është hera e parë që Komisioni Europian i bën thirrje Shqipërisë që të mos ndërmarrë një hap të tillë. Në gusht, Komisioni i kërkoi Shqipërisë të linte pas idenë e futjes së skemës së Pasaportës së Artë pasi, sipas Komisionit, ajo bie ndesh me legjislacionin e Bashkimit Evropian dhe gjithashtu përbën një rrezik të konsiderueshëm për anëtarësimin e Shqipërisë në bllok.
Progres-raporti i Shqipërisë i vitit të kaluar theksonte edhe faktin se krijimi i një programi të tillë përbën rrezik për sigurinë e vendit, ndër të tjera.
Komisioni theksoi faktin se Shqipëria ka ndjekur shumicën e rekomandimeve të bëra nga Komisioni më parë, megjithatë, raporti theksoi se Shqipëria gjithashtu ka paraqitur masa që bien ndesh me rekomandimet e Komisionit në lidhje me përafrimin si dhe programin e shtetësisë, duke theksuar kështu përparimin e mëtejshëm që është i nevojshëm për çështje specifike, ndër to heqja e planit për futjen e skemës së Pasaportës së Artë.
Skema e Pasaportës së Artë lejon të huajt e pasur që kontribuojnë financiarisht në Shqipëri dhe plotësojnë kërkesa specifike që të marrin nënshtetësinë në këtë vend. Megjithatë, shpesh ka pasur kritika se kjo skemë është një derë e hapur për shumë afera të paligjshme.
Pavarësisht rekomandimeve të Komisionit Europian, autoritetet në Shqipëri kanë theksuar më parë se nuk ka asgjë për t’u shqetësuar në lidhje me zbatimin e kësaj skeme.
