Një dygolësh i Kylian Mbappe e dërgoi Francën në fazën e 1/8 në Katar 2022. Skuadra e Deschamps është e para e kualifikuar në Botëror, por dygolëshi i djaloshit të artë të PSG, kontribuon edhe në shkrimin e rekordeve të reja. Mbappé nënshkroi suksesin kundër Danimarkës dhe përmbushi tre arritje personale.
Lexo më tej: Video / Katar 2022: Mbappe tërheq Francën, skuadra e parë në 1/8 pas fitores 2-1 me danezët
Para së gjithash, ai arriti të barazojë një rekord të mbajtur deri më tani vetëm nga Pelé. Ashtu si O'Rei, sulmuesi i Paris Saint-Germain ka shënuar 7 gola në Kupën e Botës para se të mbushë 24 vjeç. Shtatë golat gjithashtu lejuan Mbappé të barazojë Lionel Messin, duke qenë madje superior. Argjentinasi i shënoi në 20 ndeshje, kundër 9 të francezit në Kupën e Botës. Sulmuesi i Francës ka lënë pas ish-sulmuesin e Gjelave Thierry Henry (6) në renditjen e shënuesve të të gjitha kohërave të Francës. Mbappe është tani vetëm pas Just Fontaine në kuotën 13.
Sulmuesi i Francës ishte autori i të dy golave të shënuar nga të besuarit e Deschamps përballë Danimarkës. Në ndeshjen e dytë të Grupit, Mbappe hapi serinë e golave me një kombinim fantastik me Theo Hernandez. Pas barazimit të danezëve me Christensen, ishte përsëri Mbappe që shënoi avantazhin e dytë dhe përfundimtar të Francës. Me dy golat e shënuar kundër skandinavëve, Mbappe shkon në kuotën 3 në Katar 2022. Francezi udhëheq kështu renditjen e golashënuesve për Këpucën e Artë.
