Kush dëshiron të protestojë, e gjen gjithnjë një mënyrë. E kështu, Gjermania nuk është stepur nga kërcënimet e ardhura nga FIFA, por është rebeluar brenda rregullave. FIFA ndaloi shiritin One Love, duke paralajmëruar se kushdo që do të dilte jashtë uniformave zyrtare do të ndëshkohej me karton të verdhë. Kështu, Gjermania ndryshoi mënyrë, por jo qendrim.
Lojtarët e kombëtares gjermane, në foton klasike rituale, kanë vendosur dorën te goja në shenjë proteste. Një mbyllje goje, ishte ideja e shprehur me gjestin e bërë nga Panzerat para fillimit të ndeshjes. Neuer, në fakt, u detyrua të hiqte dorë nga mbajtja e shiritit të kapitenit me ngjyrat e ylberit, kushtuar komunitetit LGBTQ.
Lexo më tej: Shiriti ylber, shtatë kombëtare heqin dorë: “Fifa ka kërcënuar me kartona të verdhë”
Reagime të tjera për këtë cështje kanë ardhur edhe nga Berlini. Ndalimi nga FIFA-s i shiritit "One Love" për Kupën e Botës aktuale në Katar është "i mjerueshëm". Kështu tha zëdhënësi i qeverisë gjermane i Olaf Scholz, duke iu përgjigjur një pyetjeje në konferencën për shtyp. "Të drejtat LGBTQ nuk janë të negociueshme," shtoi ai.
KOMUNIKATA E FEDERATAVE "REBELE"
Në një deklaratë të përbashkët, Anglia, Uellsi, Belgjika, Danimarka, Gjermania, Holanda dhe Zvicra njoftuan se nuk do ta mbajnë shiritin ylber gjatë Kupës së Botës. Një vendim i detyruar nga qëndrimi i ashpër për këtë cështje nga FIFA. Ata kanë bërë të ditur se do të ndëshkojnë me kartona të verdhë kapitenët që nuk respektojnë rregulloren në fushë. “FIFA ka qenë shumë e qartë se do të vendosë sanksione sportive nëse kapitenët tanë mbajnë shiritin në fushë. Si federata kombëtare, ne nuk mund t’i vendosim lojtarët tanë në një pozicion ku ata mund të jenë subjekt i sanksioneve – shkruhej në komunikatën e përbashkët të Federatave-. Kështu që ne kemi kërkuar nga kapitenët të mos tentojnë të mbajnë shiritin One love gjatë ndeshjeve të Kupës së Botës”.
