Anëtari i Këshillit Kombëtar të Partisë Demokratike Spiro Vaso ka shpallur ditën e sotme kandidaturën e tij për të marrë pjesë në procesin e primareve. Gjatë një deklarate nga selia blu, Vaso u shpreh se e ka marrë këtë vendim për të hyrë në garë me qëllimin për t'ia kthyer bashkinë qytetarëve pas 14 majit.
Spiro Vaso tha se gjatë katër viteve të fundit bashkia e Sarandës është administruar në mënyrë të gabuar. Ai akuzoi kryebashkiakun aktual Adrian Gurma se ka përdorur për interesa personala bashkinë.
"Gjatë këtyre 4 viteve në qytetin ku unë kam lindur dhe jam rritur, bashkia është perdorur për interesa personale të Adrian Gurmës. Ai perlën e jugut, Sarandën e ka kthyer në një ndërmarrje për militantët socialist. I ka mbyllur dyert qytetarëve dhe demokratëve të ndershëm. Ndaj si një i ri i këtij qyteti mora këtë vendim që së bashku me ju të largojmë këtë të keqe; e cila e ka kapur qytetin tonë prej 12 vitesh.
Ndihem i trishtuar se si pushteti lokal dhe ai qendror i Partisë Socialiste i kanë detyruar të rinjtë të braktisin vendin. Atyre që jetojnë aktualisht ne këtë qytet, u kanë mbyllur çdo mundësi për një të ardhme më të mirë", tha Vaso.
