Detaje të tjera nga dosja hetimore e radikalit të arrestuar në Tiranë janë zbuluar. 50-vjeçari Xherxh Laçi, i cili mbante familjen të ngujuar prej vitesh, është arrestuar nga policia. Në polici, bashkëshortja e 50-vjeçarit është shprehur se ai ka ushtruar prej 12 vitesh dhunë fizike dhe psikologjike. Ai ka dhunuar në mënyrë të vazhdueshme atë, por dhe fëmijët e mitur. Sipas saj, dhunën fizike bashkëshorti e ka ushtruar në prani të fëmijëve. Në këtë mënyrë, ai i ka krijuar shumë stres dhe frikë. Gruaja e Laçit kallëzon se bashkëshorti i saj paraqet rrezikshmëri të lartë. Ajo rrëfen se e ka parë para disa vitesh duke fshehur lëndë eksplozive dhe municion në një gropë në oborrin e shtëpisë.
Më parë, ai ka qenë i dënuar për armëmbatje pasi mbante një automatik te koka e krevatit, madje ka bërë dhe dy vite burg. Gruaja ka thënë se ajo dhe fëmijët janë në gjendje shumë të rënduar psikologjike. Kjo pasi ai nuk i lejon të dalin jashtë mureve të shtëpisë, duke i mbajtur të mbyllur brenda. Së fundmi, sipas gruas, ka filluar të frekuentojë shumë xhaminë.
Lexo më shumë: Ngujoi për 6 vite familjen, zbardhet dëshmia e radikalistit: Doja t’i ruaja nga e keqja
Kanë qenë komshinjtë që lajmëruan policinë pasi dyshuan se Xherxh Laçi mund të kishte dhunuar familjarët. Pasi ka mbërritur policia, është mësuar se Laçi kishte ngujuar bashkëshorten e tij për 6 vite me radhë. Ata jetonin në zonën e '5 Majit’ në Tiranë. Prej 1 viti, 50-vjeçari ngujoi edhe dy fëmijët e tij, të cilët nuk i kishte lënë të vazhdonin gjimnazin. Vetë Laçi dilte nga shtëpia vetëm ditën e premte, pasi shkonte në xhami për t'u falur.
