Kreu i Partisë Demokratike, Sali Berisha, është shprehur se Partia Demokratike, mbështet totalisht çdo hap dhe vendim të sindikatës se pedagogëve dhe çdo organizate që kërkon të drejtat e veta.
Nëpërmjet një deklarate për mediet, Berisha tha se nuk mund të pranojë një pedagog në Shqipëri të paguhet sa gjysma e pedagogëve në Kosovë.
Sali Berisha: Përshëndes Sindikatën e Universiteteve të vendit, për betejën e tyre, vendosmërinë, mbrojtjen që kjo sindikatë u bëri dhe u bën interesave jetike të pedagogëve, punonjësve dhe studentëve të universiteteve tona, por edhe interesave jetike të shoqërisë shqiptare dhe kombit shqiptar. Kjo sindikatë, në interesin më të mirë të kësaj beteje, ka vendosur të ndërpresë thirrjet për bojkot, por të vazhdojë luftën dhe betejën. E garantoj se në çdo hap të saj, ajo dhe cilado organizatë apo individ që mbron një kauzë të drejtë, do ketë mbështetjen totale të PD-së. Me këtë rast, theksoj se nuk mund të pajtohem kurrë që një pedagog në universitetin e Tiranës të marr gjysmën e rrogës që merr një pedagog në universitetin e Prishtinës, dhe kjo vetëm për faktin se qeveria e Kosovës nuk vjedh fondet siç vjedh Edi Rama.
Pedagogët u rikthyen sot në auditore, pasi u tërhoqën nga vendimi për të bojkotuar procesin mësimor. Kreu i sindikatës, Aleksandër Kovaçi tha se kjo është e përkohshme, ndërsa protestat vazhdojnë.
Ditën e nesërme pedagogët kanë njoftuar protestën e katërt kombëtare në kampusin qëndror të Universitetit Politeknik. Pedagogët kërkojnë rritjen me 50% të pagave dhe nuk pranojnë vendimin e qeverisë për rritje me 7% nga buxheti i shtetit dhe 8% nga ai i universiteteve.
