Hakerat iranianë kanë publikuar mbrëmjen e së mërkurës të tjera të dhëna të marra në sistemet shqiptare.
Në faqen e tyre në Telegram, “Homeland Justice” apo “Drejtësia e Atdheut” ata kanë publikuar një listë të gjatë me të gjitha të dhënat e punonjësve të Shërbimit Informativ Shqiptar.
Pjesë e të dhënave janë emrat, funksioni që kryejnë, email-et dhe numrat e telefonit të pjesës më të madhe të këtyre punonjësve. Për herë të parë dalin edhe emrat e punonjësve të SHISH që punojnë në drejtorinë e kundërzbulimit.
Lapsi.al e zotëron të gjithë listën e publikuar prej hakerave. Ata japin edhe një mesazh për qeverinë shqiptare me publikimin e kësaj liste.
“Krenarë që strehoni terroristët? Gjithashtu krenar për të mirëpritur pasojat që bëjnë njerëzit tuaj të vuajnë. Huh?” – thuhet në mesazh.
Pak ditë më parë ata publikuan edhe të dhënat e vetë kreut të SHISH, Helidon Bendo dhe familjarëve të tij. Aty dolën të gjitha të dhënat personale të Bendos. U publikuan numrat e telefonit, adresa e saktë, makinat që ka në zotërim ai dhe bashkëshortja e tij.
Janë publikuar numri i kartës së identitetit dhe të gjitha numrat e pasaportave që zotëron (të zakonshme apo diplomatike). Janë të publikuara të gjitha hyrjet dhe daljet e kreut të SHISH nga territori shqiptar.
Më pas u publikuan të dhënat e kryeministrit Rama. Ajo ka shkaktuar më shumë debate janë bërë udhëtimet e kreut të qeverisë me avion charter. ©LAPSI.al
LEXO EDHE: Hakerat iranianë nxjerrin të dhënat e kreut të SHISH
