Deputeti i PD-së, Edi Paloka ka deklaruar se pala e përfaqësuar prej tij për dialogun me grupin tjetër brenda partisë nuk ka vënë asnjë kusht. Deklarata e Palokës vjen në një kohë kur Grupi i “Alibeajt” njoftoi dështimin e bisedimeve.
“Duhet t’ju them që Statuti edhe i vjetri, ai që sot konsiderohet si statuti i tyre, ka primaret. Nuk ka asnjë pikë në Statut që të na përplasë mbi primaret. Në deklaratë e tyre të publikuar dje kërkohej eliminimi i strukturave të PD të ngritura nga një vit sakrificash.
Theksohej një strukturë jashtë strukturash me anëtarë të barabartë e të vendoste me votë unanime. Nëse njëri thoshte jo procesi binte poshtë. Veto që kërkohet jo kur ke vullnet për të bashkëpunuar por që ditën e parë mendon si ta bllokosh. E kuptoj kur kjo i kërkohet Ramës, por brenda partisë tënde ku supozohet që ke hyrë me vullnet.
Kam biseduar dje me zotin Bardhi në Parlament e i kam thënë këto që po ju them ju. Pse të vëmë grepa e të vendosim ngërçe. Nëse nuk duam të bashkëpunojmë nuk kemi pse bisedojmë fare nuk kemi pse vëmë kushte. Ne veç primareve nuk kemi vënë asnjë kusht”, - tha ai. /LAPSI.al
