Jurgen Klopp elozhe pa fund për Napolin, përpara sfidës në Champions: "Nëse vazhdojnë të luajnë kështu, kanë mundësinë të arrijnë në finalen e Champions League. Më pëlqen shumë ajo që po bëjnë, asgjë për të thënë. Ata janë ekipi më në formë i Europës". Liverpool duhet t'i mundë italianët me katër ose më shumë gola për të përfunduar i pari në Grupin A: "Të fillojmë të përpiqemi të fitojmë, pastaj të mendojmë për golat. Pas humbjes së ndeshjes së parë, ne jemi të motivuar. E kur një ekip bën një seri fitoresh kaq të gjatë, nuk i dihet kurrë si do të jetë performanca e radhës".
KLOPP KËRKON AKOMA KOHË
Reds nuk po kalojnë një moment të mirë forme: “Goli i pësuar në minutën e 89-të ndaj Leeds më ka hequr gjumin. E mendoj edhe kur shkoj në tualet... Nuk mund të mendojmë t’i zgjidhim të gjitha problemet në një ndeshje të vetme. Por duke luajtur një nga një. Natyrisht edhe duke shpresuar që të rikthehen të gjithë lojtarët të shëndetshëm pas Kupës së Botës. Për mendimin tim është e padrejtë të më vlerësosh mua dhe lojtarët tani. Do të bëjmë një bilanc përfundimtar në fund të sezonit. Tani ne duhet të vazhdojmë të luftojmë".
Klopp rikthehet te argumenti Napoli: "Unë e respektoj atë që po bën dhe Spalletti na respekton ne. Nuk mendoj se kanë kopjuar stilin tonë. Në mbrojtje luajnë një futboll ndryshe dhe kanë energji dhe intensitet. Një ekip që na pëlqen ta shikojmë".
