“Tërmet! Tërmet!” Ishte fjala e Damian Gjiknurit në përgjimet e publikuara nga “Bild”. Ish-ministri socialist fliste me krenari për atë që kishin bërë në zgjedhjet lokale të 2016-ës në Dibër. Manipulimi i atyre zgjedhjeve pasoi një ping-pong mes prokurorive dhe u katandis në një grusht të vogël zyrtarësh të parëndësishëm që ende nuk e kanë marrë vendimin për shkak të zvarritjeve. Dosja e njohur si 184 u pasua edhe me disa përgjime të publikuara nga gazeta gjermane “Bild”. Në to dëgjohej edhe vetë Edi Rama që kërkonte nëse ishte realizuar plani.
Tani që askush nuk është dënuar, Edi Rama ka mundësinë që edhe të tallet. Gjatë një vizite 2-ditore në Peshkopi, Rama ka ndarë edhe një video në rrjetet sociale. Në një takim me socialistët i është festuar ditëlindja bashkëkryetares së PS-së së Peshkopisë. Në krah të Belinda Ballukut, Rama premton se tashmë nuk do e bëjnë më “tërmet, por cunam”.
Ndërsa në një tjetër foto të publikuar po në Dibrër nuk i kursen shigjetimet për opozitën. “Nga Dibra e mrekullueshme, ku pas përhumbjes në braktisjen e gjatë deri kur nisëm së bashku përpjekjen tonë, kanë nisur të duken frytet e një pune plot mund e durim mbi djerrinën që la pas e Djathta e Rublave, duke i falënderuar mijëra njerëzit që më pritën, më dëgjuan e më thanë gjëra me mend në dy ditët e kaluara së bashku, nga Bulqiza, në Mat, Klos e Peshkopi, ju uroj të gjithëve një të diel të bukur” – shkroi Rama në Facebook. ©LAPSI.al
LEXO EDHE: Tërmet, tërmet/ Përgjigjja e Gjiknurit kur i kujtojnë përgjimet e BILD
