Kryeministri i ri i Britanisë Rishi Sunak dhe presidenti francez Emmanuel Macron diskutuan çështjen e emigrantëve klandestinë që kalojnë nëpërmjet kanalit të La Manshit në bisedën e tyre të parë telefonike që kur zoti Sunak mori detyrën sipas një njoftimi të qeverisë britanike.
Por kjo çështje nuk përmendej në njoftimin zyrtar të zyrës së zotit Macron pavarësisht se të dyja palët kërkuan që në komentet e tyre pas bisedës, të zbusin tensionet e fundit dypalëshe.
Në njoftimin e zyrës së presidentit francez thuhej se zoti Macron uroi zotin Sunak për detyrën, duke shtuar se të dy ranë dakord të përgatisin një takim dypalësh vitin e ardhshëm.
Presidenti francez e sheh luftën në Ukrainë dhe çështjen e ndryshimeve klimatike si sfida të përbashkëta dhe u shpreh i gatshëm të thellojë lidhjet mes dy vendeve, thuhej në deklaratë.
Zëdhënësi i kryeministrit britanik tha se zoti Sunak theksoi rëndësinë e marrëdhënieve të Mbretërisë së Bashkuar me Francën, duke e quajtur një vend fqinj e aleat.
Marrëdhëniet mes Francës dhe Britanisë kanë qenë të tensionuara vitet e fundit, veçanërisht që kur Britania u largua nga Bashkimi Evropian në fillim të vitit 2020. Dy vendet shpesh kanë akuzuar njëri-tjetrin për një sërë problemesh, mes tyre mosmarrëveshjet mbi çështjen e peshkimit pas Brexit-it dhe dështimin për të frenuar fluksin e emigrantëve klandestinë që kalojnë nëpërmjet kanalit të La Manshit.
“Kryeministri theksoi rëndësinë që të dy vendet ta shndërrojnë kanalin (e La Manshit) në një korridor plotësisht të papërdorshëm për trafikantët“, tha zëdhënësi i Downing Street pas telefonatës.
Në një artikull të gazetës The Times të botuar të enjten, thuhej se zoti Sunak po kërkonte një marrëveshje të re me Francën, ku të përcaktoheshin objektiva mbi numrin e anijeve që nuk do të lejohen të hyjnë në Britani./VOA/
