Kreu i Partisë Demorkatike, Sali Berisha deklaroi se bisedimet brenda PD-së po vazhdojnë. I ftuar në emisionin "Open", Sali Berisha është ndalur te situata brenda PD. Ai pranoi se është e shtensionuar, por shtoi se ende ka diskutime mes palëve. Berisha tha se nëse Enkelejd Alibeaj dhe mbështetësit e tij zgjedhin që të grupohen, mund të shpallin një fraksion.
"Nuk ka njoftime zyrtare sepse janë brenda grupit. Janë brenda partisë. Janë brenda anëtarëve të një partie. Këto janë midis partive të ndryshme. Gjithçka është në kuadrin e një statuti të një partie.
Me këtë statut ata kanë çdo të drejtë që ka Paloka apo Berisha. Në qoftë se ata grupohen në një platformë të tyre, kanë të drejtë të shpallin fraksionin. Kur statuti u njeh të drejtën e fraksionit, statuti i lejon ata të kenë mendimet e tyre, t’i paraqesin mendimet e tyre dhe t’i debatojnë mendimet e tyre.
Zgjidhja e problemit është brenda statutit. Kanë të drejtë të krijojnë fraksion pa më pyetur e pa marrë leje nga askush. Se çfarë pretendon ai është krejt tjetër, por Statuti nuk përjashton njeri. Berisha mund të donte që disa prej tyre të ishin jashtë PD, por statuti nuk pranon përjashtimin," - tha Berisha.
“Secili prej tyre ka të drejtë të kandidojë për kryetar bashkie e të propozojë emra për kryetarë apo këshilltarë. Këtu është krejt tjetër. Askush me gjithë qëndrimin e tyre nuk mund t’i përjashtojë. Kemi një statut demokratik që pranon fraksionin.
Unë i ftoj të përfitojnë nga të gjitha të drejtat që u njeh statuti. Nuk u them krijoni fraksion. Për të treguar se janë të mbrojtur. Në primare do votojnë simpatizantë dhe anëtarësia. U shkelmua statuti nga Basha e u krijuan probleme” – tha Berisha.
