Pas disa javësh në protestë, është organizuar në një forum të hapur me pedagogë e studentë, për të diskutuar vazhdimin e protestës dhe bojkotit të tyre për kërkesat drejtuar qeverisë. Pedagogët janë shprehur se do të prezantojnë një platforme për ndryshimin e universitetit, që kanë si qëllim përmirësimin e cilësisë së arsimit por jo vetëm.
Pedagogia Mimoza Hafizi, ish-deputete socialiste, shprehu shqetësimet e dukshme në sistemin e arsimit të lartë.
"Unë isha e bindur që pedagogëve i takon të ketë rrogë shumë të lartë krahasuar me standardet e rajonit. Le ta hedhim shikimin drejt vetes. Nëse ne jemi në gjendje të zgjidhim disa nga problemet e brendshme, atëherë do jemi shumë më të fortë para politikës dhe qeverisë.Ne kemi ardhur në universitet për të dhënë mësim dhe jo për t’u mbyllur në zyra. Por është një detyrë që duhet bërë. Edhe unë kam qenë shefe departamenti. Mezi kam pritur që ta marrë dikush tjetër”, theksoi ndër të tjera Mimoza Hafizi.
Pedagogia Enkelejda Olldashi e Fakultetit të Drejtësisë në Tiranë shtoi se pedagogët sot nuk duhet të ndihen sikur janë të punësuar. Ajo tha se punëdhënësit e tyre sipas saj janë vetëm studentët e jo drejtuesit e institucioneve.
“Ata që janë gjithmonë të përkohshëm në një marrëdhënie pune janë punëdhënësit, ne jemi të përhershëm”, u shpreh një prej pedagogeve. Ne ofrojmë një shërbim, nuk i konsideroj më drejtuesit punëdhënës, vetëm studentët. Ata që na japin punë përditë janë studentët tanë, me ata i kemi marrëdhëniet e punës. Duhet të artikulojmë një platformë dhe më pas të negociojmë një marrëveshje. Ne duhet të ndihemi sikur nuk jemi të punësuar sot. Shumë profesorë na janë bashkuar, janë ata që dalin dhe kanë kurajë të dalin përballë”, ka diskutuar Olldashi.
