Saga e hidh-e-pritjeve të Edi Ramës me Agron Shehajt vazhdon, dhe për habinë e askujt, avantazhin e ka Rama.
Deputeti i opozitës njoftoi sot në rrjetet sociale se Gjykata vendosi kundër tij, ose siç thotë ai, në favor të Edi Ramës.
Shehaj zbuloi se Gjykata Administrative e Tiranës ka vendosur që biznesi i tij të vazhdohet të mbahet i bllokuar.
"Gjykata sapo vendosi në favor të Edi Ramës. Në këtë vend kur verdiktin e jep kryeministri, nuk ka asnjë njeri tjetër që ta kundërshtojë atë. Ky ishte një gjyq farsë ku Policia fiton pa paraqitur asnjë provë, urdhër apo akt para gjykatës". Kështu shkruan Shehaj në Facebook, ndërsa në TikTok mesazhin e jep me zë dhe figurë edhe më të detajuar.
Për t'iu rikthyer argumentit që ngritëm se askush nuk duhet të habitet që Agron Shehajt ia mbyllën qepenin forcërisht, le të kujtojmë si nisi përplasja publike Rama-Shehaj dhe çfarë detajesh u bënë publike në media.
Edi Rama deklaroi publikisht se bisnesi është në një godinë pa leje. Godina që nuk i takon Agron Shehajt, por e marrë me qera nga kompania e tij, ka një leje ndërtimi të firmosur nga Erion Veliaj. Pra, Rama ka gënjyer. Qiramarësi nuk ka përgjegjësi, por i takon organeve shtetërore të kontollojnë paligjshmëritë. Me ç'duket autoritetet u kujtuan të ndëshkojnë pronarin e godinës kur aty hyri një deputet i opozitës.
Lexo më tej: Rama sulmon biznesin e Agron Shehajt, si qëndron e vërteta?
Edhe nëse presupozojmë se qëllimi për bllokimin e godinës ka qenë qelibar, por hallin e qiramarrësit kush e mban? A janë koshient autoritetet se në atë godinë kishte 200 punonjës që prej fillimit të muajit kanë ndërprerë punën sepse policia ja bllokoi beftas ambientin?
Duke llogaritur gjithçka, dhe duke kuptuar se autoritetet nuk e respektojnë biznesin "We Web Developers", as nuk kujdesen ta vazhdojnë kontratën me këtë biznes qeramarrës, a mund të themi se qëllimi i bllokimit të godinës pa paralajmërim ishte legjitim?
Faktet provojnë diçka tjetër. E duke qenë se deputeti Shehaj ka nxjerrë dokumenta se biznesi i tij nuk është urdhëruar të bllokohet nga Prokuroria (shiko këtu), dhe se punimet në godinë kanë qenë me leje (shiko këtu), legjitimiteti i ofensivës së Ramës shkërmoqet.
Dhe së fundmi, për t'i vënë kapakun të gjithës kësaj, vjen edhe një vendim i Gjykatës së Administrative të Tiranës. Me një drejtësi të pavarur, duke marrë parasysh të gjithë këto fakte, a do mbahej një biznes i bllokuar indefinitivisht?
Kur kujtojmë se drejtësia e re vjetërohet dhe plaket sapo përmenden inceneratorët e koncesionet e shëndetësisë, kur harta e gjykatave riformatohet sipas vullnetit të qeverisë, e kur patericë i bëhet ambasadorja me deklaratat pompoze për "heronj fëmijësh", përfundimi që arrijmë për rastin e Agron Shehajt është mëse i qartë.
Nëse je zë i zellshëm kundër qeverisë, qepenat do të të mbahen të mbyllur, me apo pa të drejtë. Drejtësia kthehet në zgjatim të pushtetit. ©Lapsi.al
