522 mijë euro u zbuluan në tavanin e një autobusi që mbërriti në portin e Durrësit me tragetin e linjës së Barit. Autobusi ishte nisur nga Padova e Italisë dhe do të vinte në Lushnje. Policia tha se ndaloi pronarin dhe njëkohësisht shofer i autobusit, Elidon Çela.
Në pranga janë vënë edhe 2 persona të tjerë që ishin ndihmës të 32-vjeçarit. Para hetuesve ai ka deklaruar se nuk ka pasur dijeni për paratë. Sipas tij ato mund të jenë futur nga persona të tjerë. Mediat shkruajnë se kjo nuk është hera e parë që kompania e transportit në pronësi Elidon Çelës, bëhet objekt shkeljesh të ligjit.
Edhe më herët kompania e tij është futur nën hetim nga policia për shkak të shumave të parave të gjetura kontrabandë. Kompania është mbajtur nën vëzhgim rreth 1 muaj për shkak të riskut të lartë. Autoritetet kanë pasur të dhëna për futjen e të tilla mallrave kontabandë.
Policia ka mundur të bëjë gjetjen e parave me anë të skanerit. Paratë ishin të prerjeve 10, 20, 50 dhe 100 euro të ndara në 6 qese. Përveç parave janë sekuestruar edhe mallra të tjera të kontrabanduara. U gjetën kafe, cigare, pije alkoolike, ilaçe, karroca për fëmijë, elektroshtëpiake dhe veshmbathje. ©LAPSI.al
