Trajneri i Anglisë, Gareth Southgate, do të marrë një mega bonus shtatëshifror nëse skuadra e tij arrin të fitojë Botërorin. Katër vite më parë, Federata angleze i premtoi 52-vjeçarit një bonus prej 1.5 milionë paund, nëse fitonte në Rusi 2018. Megjithatë ëndrra e Tre Luanëve u shkatërrua nga Kroacia. Tani, pak më shumë se një muaj para fillimit të kompeticionit të Katarit, FA befason trajnerin me një premtim të ri. Nëse ai mund ta udhëheqë ekipin e tij drejt lavdisë në Lindjen e Mesme, ai do të marrë një bonus yjor shtatë-shifror.
Southgate ka nënshkruar një marrëveshje me Federatën që i lejon atij të cojë në shtëpi 6 milionë paund në vit. Një kontratë që skadon në vitin 2024. FA i ka premtuar tashmë trajnerit 500 mijë paund në rast kualifikimi në 1/8. Por për të stimuluar më tej trajnerin, ka shtuar edhe një super bonus prej 4 milionë paund. 52-vjeçari, shpjegon Sun, do të mund ta arkëtojë këtë shumë, vetëm nëse fiton Kupën e Botës. Muajt e fundit, Southgate është vënë nën vëzhgimin e kritikëve për shkak të formës së dobët të skuadrës së tij. Anglia nuk ka arritur të fitojë në gjashtë ndeshjet e fundit dhe këto rezultate shqetësojnë tifozët.
SOUTHGATE, GATI TË BËJË NJË HAP PRAPA
Sipas disa zërave, trajneri po mendon edhe dorëheqjen pas Botërorit në Katar. Edhe pse ai, tani për tani, i largon thashethemet për një lamtumirë. Megjithatë, nëse rezultatet nuk vijnë, ai është gati të bëjë një hap prapa: “Të jesh pjesë e Anglisë si lojtar dhe trajner është ndoshta nderi më i madh për mua. Shpresoj se ky nuk është fundi. E di që në fund do të gjykohem për atë që do të ndodhë në Kupën e Botës. Kontratat janë të parëndësishme në futboll. Sepse trajnerët mund të kenë kontrata tre, katër ose pesë vjeçare dhe të jenë dakord që nëse rezultatet nuk janë të duhurat, të ndahen rrugët. Pse duhet të jem unë ndryshe? Nuk jam aq arrogant sa të mendoj se kontrata ime do të më mbrojë në ndonjë mënyrë”.
