Tirana rrëmben fitoren në javën e tetë të Superiores, duke vënë nën presion Partizanin që duhet ende të luajë. Bardheblutë kalojnë 1-0 në transfertën me Bylis, të tërhequr nga Florent Hasani, autori i golit. Ndahen në paqe Laçi e Vllaznia, në një 1-1 që nuk lë askënd të kënaqur. Një pasdite me pak gola, por pozitive vetëm për skuadrën e Shehit, që arrin provizorisht në vendin e parë të renditjes.
BYLIS 0-1 TIRANA
Pas barazimit 3-3 me Laçin, Tirana është rikthyer sërish te fitorja duke mundur në transfertë Bylisin 0-1. Një ndeshje e ekuilibruar, e dëshmuar edhe nga rezultati iu ngushtë, por që vlen shumë për të besuarit e Shehit. Një Bylis i mirë provoi të luante hapur me Tiranën, duke rrezikuar jo pak portën e Bekaj. Lajthia ishte lojtari më i rrezikshëm për mallakastriotët, sidomos në pjesën e parë. Nga ana tjetër, Tirana ishte racionale, e kujdesshme dhe e duruar. Pas pjesës së parë në pritje, bardheblutë shfaqën gjithë cinizmin e tyre në të dytën, kur në rastin e parë të vërtetë Florent Hasani ndëshkoi Bylis. Sulmuesi vendosi fatet e ndeshjes në minutën e 79’, duke befasuar të besuarit e Bellait, tepër të përqendruar te Xhixha. Kështu Tirana shkon në kuotën e 15 pikëve, ndërsa Bylisi qëndron me 11 pikë.
LAÇI 1-1 VLLAZNIA
Pika e dytë radhazi për Vukicevic, shumë pak për renditjen dhe pretendimet e Laçit, me 1-1 përballë Vllaznisë. E megjithatë më mirë se seria e humbjeve të kurbinasve, që shkojnë në 5 pikë pas 8 javësh, por janë të fundit. Ndeshja e tretë pa fitore edhe për Vllazninë dhe për Josën situata nuk është e mirë. Në sfidën e luajtur në Laç, dy skuadrat ndajnë një 1-1që nuk kënaq asnjë nga ekipet. Shkodranët shohin të rritet hendeku me skuadrat kryesuese, por për mënyrën si shkuan gjërat duhet të jenë të kënaqur. Ndeshja ka qenë e ekuilibruar në pjesën e parë, pasi rastet kanë qenë të pakta për shënim, ndonëse nuk ka munguar lufta e fortë. Goli i Adeleke i dha avantazhin kurbinasve, pro ata nuk ia dolën të administronin rezultatin deri në fund, duke pësuar edhe në këtë sfidë, me Markun i cili vendosi barazpeshën në shifra, Në fund, shkodranët iu afruan edhe golit të fitores, por kjo nuk mjafton që renditja të përmirësohet.
