“Arritëm më në fund të fitojmë, pavarësisht se me shumë vështirësi, jo me lojën më të mirë që mund të bëjmë. Dhe patjetër që me fat, nuk duhet të harrojmë që ka kundërshtarë përballë dhe mendoj se i sotmi është ndër më të fortët e më të mirët e Superiores". Bledi Shkëmbi është tepër i ekzaltuar pas fitores së parë sezonale të Teutës. Për më tepër me përmbysje e në minutën e 97.
Një sukses që erdhi pas frikës në golin e Delarzh: "Çfarë mendova pas golit të Egnatias? Janë ato sekondat e momentin që po na ikën edhe një ndeshje duke humbur. Por gjithmonë në futboll duhet të besosh deri në fund, ne besuam, u munduam t’i japim diçka më tepër sulmit. Por mendoj se merita kryesore është e futbollistëve, ishin ata që u munduan më shumë dhe me fat ia dolëm ta kthenim".
BATUTA
Një perlë e Kotobellit ndryshoi kursin e ndeshjes, që ishte bërë keq pas golit të Delarzh. Shkëmbi megjithatë u mundua ta kalojë me batutë. "Goli i Kotobellit? Më shumë është fat, se po të ishte këmba e majtë mund të thosha diçka. Por është fat e përqendrim që ai top i kthyer me këmbën e djathtë të kthehet në portë. Është rrugë e gjatë dhe fati sot nëse nuk e ke… U thashë djemve që fati do të vijë, por ne duhet të bëjmë maksimumin".
Teuta lëviz më në fund nga vendi i fundit, por në raport me golin dicka duhet të përmirësojë. Jo vetëm 3 gola në 7 javë, por edhe në këtë sukses të parë, golat i shënuan mbrojtësit: "Unë nuk i tërheq veshin sulmuesve, por i mbaj aty te porta në stërvitje që të shënojnë sa më shumë”, e mbylli Shkëmbi.
