Komisioni Evropian në draft-raportin e tij për Malin e Zi thotë se Podgorica zyrtare i ka ikur agjendës të politikave të Bashkimit Evropian duke kritikuar qeveritë dhe parlamentin në kabinetet Zdravko Krivokapiç dhe Dritan Abazoviç.
Në draft-raport theksohet se nuk është bërë asnjë progres në lidhje me reformën gjithëpërfshirëse të kuadrit ligjor dhe institucional zgjedhor, duke përfshirë rekomandimet e OSBE-ODIHR.
Sipas ekspertëve të Komisionit, Qeveritë e Malit të Zi dhe Parlamenti nuk arritën të demonstrojnë në praktikë përkushtimin e tyre ndaj agjendës së reformave në raport me Bashkimin Evropian.
Mungesa e angazhimit mes partive politike dhe dështimi për të ndërtuar konsensus për çështjet kyçe të interesit kombëtar vijuan dhe çuan në rënien e dy qeverive.
Ekzekutivi i BE-së përmend edhe Marrëveshjen për Kishën Ortodokse Serbe ka ndikuar në atmosferën politike dhe ka shkaktuar rritje tensionesh.
Megjithatë Podgorica zyrtare ka marrë një vlerësim të lartë sa i përket përafrimit të politikës së jashtme të vendit, sa i përket sanksioneve kundër Rusisë në lidhje me Ukrainën.
